MBUNGE AWASHAURI WANAWAKE KUWAHESHIMU WANAUME

  Mbunge wa viti maalum mkoa wa Mbeya, Dr. Mary Mwanjelwa, akitoa hotuba kwenye maadhimisho ya siku ya wanawake Duniani iliyoandaliwa na wanawake Jiji la Mbeya.

MBUNGE wa viti maalum mkoa wa Mbeya, Dr. Mary Mwanjelwa, amewashauri wanawake kote nchini kuwaheshimu wanaume ili nao wapendwe na kuthaminiwa kama yalivyoagiza maadiko ya vitabu vya Mungu.

Aliyasema hayo jana, katika viwanja vya CCM Ilomba Jijini hapa, alipokuwa akiwahutubia wanawake wakati wa siku ya wanawake duniani na katika jukwaa la wanawake wa kikristo Tanzania lililofanyika kanisa la Romani Parish ya Mwanjelwa.

Alisema Mwanaume ni kichwa cha nyumba lakini mwanamke ni nguzo,  na wanaume wanawacheka wanawake kwasababu hawapendani, hivyo alihimiza upendo, kukosoana kwa hekima na kusameheana kwa wanawake.

‘’Nalipongeza dawati la jinsia la Jeshi la polisi ambalo linapambana na suala zima la unyanyasaji wa kijinsia. Tukiwa na wanawake wanaopendana na kuonyana kwa hekima tutafaulu kutokomeza mfumo dume’’ alisema Dr. Mwanjelwa.

Alisema wanawake wana nguvu za kuutumikia umma na mfano mzuri ni kwamba mwanamume akitangulia mbele za haki, mwanamke anao uwezo mkubwa wa kuwalea watoto na kuwasomesha kwa kufanya ujasiliamali tofauti na akitangulia mwanamke.

Mchungaji wa chuo kikuu cha Teofilo Kisanji(TEKU), Mary Kategile, ambaye ni mjane mwenye watoto saba na wajukuu saba, aliwataka wanawake kujitambua kuwa wana thamani kubwa mbele za Mungu.

Katibu wa wanawake  wakristo jukwaa la Mbeya, Joyce Mbeyela, alisema  wanawake hao, wanashughulika na masuala ya maombi na kutembelea wahitaji wakiwemo wagonjwa wa majumbani, yatima, wasiojiweza, wazee na wajane.

‘’Ibada hii ya maombezi inalenga kuvunja ukatili wa watoto, walemavu na wazee ikiwa ni pamoja na kuombea viongozi wa dini hasa mauaji ya viongozi, umoja wetu, nchi yetu, Bunge la katiba, vijana, ndoa na Mbunge Mary Mwanjelwa’’ alisema Joyce.

Akisoma risala ya maadhimisho ya wanawake wa Jiji la Mbeya, Rehema Ngao, alisema ubaguzi wa kijinsia umekuwa unawaweka wanawake na wasichana katika wakati mgumu hasa wanapopambana na maisha.

Mwalimu Cecilia Ndele, aliuambia mtandao huu kuwa, wanafunzi wa kike na kiume wamekuwa waathirika wakubwa katika ndoa zenye migogoro na kufikia hatua ya talaka.

Alisema wanandoa wanaotarakiana, watoto wao wanabeba mzigo wa kulea familia na kushindwa kuhudhuria vema masomo huku baadhi ya watoto wa kike wakijiingiza katika vitendo vya ngono za utototni.

‘’Maadili yameporomoka, baadhi ni kutokana na Mama zao ambao wamekithri kwa matusi na malezi ya kuiga nchi za magharibi ndiyo maana leo hii watoto wa kike wenye miaka 10-12 hawana bikra zao na wakiolewa wanaachika haraka’’ alisema Mwalimu Cecilia Ndele.