KIJANA ASHIDA NA PINGU ZA POLISI KWA SAA NANE

 KAMANDA POLISI MBEYA, MSANGI.

KIJANA Medi Wailes, mkazi wa Kijiji cha Chalangwa wilaya ya Chunya mkoani hapa, amejikuta akishinda na pingu kwa zaidi ya saa nane, baada ya polisi waliomfunga pingu hizo kuwakimbia wananchi waliokuwa wakipinga kukamatwa kijana huyo kwa kosa la kumpinga mwekezaji wa madini.

Tukio la kumfunga pingu kijana huyo, lilianza majira ya saa 8;35 za usiku wa kuamkia Machi 3, mwaka huu, baada ya askari polisi kufika kijijini hapo na kuwakamata baadhi ya wananchi wanaompinga Mwekezaji, Joseph Mwazyele.

Mwazyele anadaiwa kutaka kufungua mgodi katika kijijiji hicho, jambo ambalo baadhi ya wananchi wanapinga ingawa baadhi wanahitaji uwekezaji huo ufanyike.

Baada ya hali hiyo kutokea, wananchi walipiga mbiu, ambapo baada ya askari polisi kuona hivyo walikimbia huku wakimwacha Wailesi akiwa na pingu mkononi na ndipo wananchi wakafunga barabara na kusababisha kutopita magari yanayofanya safari zake za Mbeya-Chunya mpaka majira ya saa Nne asubuhi leo.

Kamati ya ulinzi na usalama wilaya ya Chunya, iliwasili eneo la tukio kwa lengo la kuwatuliza wananchi majira ya saa 1;50 asubuhi. Ambapo wananchi walikataa kugungua barabara wakimhitaji Mkuu wa mkoa wa Mbeya na uongozi wa madini wilaya na mkoa na funguo za pingu.

Wakati mazungumzo yakiendelea, ziliingia gari nne za askari wa kutuliza ghasia(FFU), na kuanza kufungua geti la barabra hiyo huku wananchi wakitaka mwenzao afunguliwe pingu.

Gari hizo ambazo zilikuwa zimejaa askari, zilikuwa na namba za usajili PT 2079, PT 1931, PT 0943 na PT 1925 na hatimaye zikaondoka eneo hilo.

Mkuu wa wilaya ya Chunya, Deodutus Kinawiro alianza kuzungumza na wananchi wa kijiji hicho katika uwanja wa shule ya Msingi Chalangwa.

Kinawiro alisisema eneo hilo linalolalamikiwa linasitishwa uwekezaji na shughuli zingine ambapo amewataka wanaohitaji kuwekeza, waanzie ngazi ya kijiji na kuwasihi wananchi kuacha kujichukulia sheria mkononi.

Mkuu huyo alipata wakati mgumu alipomtaka aliyefungwa pingu kujisalimisha polisi jambo ambalo zilitokea kelele kutoka kwa baadhi ya wananchi wakipinga maamuzi hayo huku wakiwa wamemficha kijana huyo.

Baada ya hapo, Mkuu wa wilaya aliamuru kijana huyo kujitokeza eneo la mkutano ili afunguliwe pingu mbele ya mkutano. Wananchi wenzake walimleta kijana huyo na kufunguliwa pingu kisha mkutano ukafungwa na hali ya usalama ikarejea.