ALIYEJIFUNGUA MAPACHA WANNE MBEYA NA KUFARIKI WAWILI ANENA

 AIDA Nakalawa(25) akizungumza na Mwandishi wa habari katika hospitali ya wazazi Meta Jijini Mbeya.

 Watoto waliohai ambao Madaktari wanaendelea kuwapa matibabu katika Hospitali ya Wazazi Meta Mbeya.

*Baridi na usafi vyatajwa chanzo cha vifo

*Mapacha waliobaki wanaharisha, wawekwa chini ya uangalizi.

MADAKTARI wa hospitali ya Rufaa ya Mbeya kitengo cha wazazi(META), wametaja chanzo cha mapacha wawili kati ya wanne wa Aida Nakalawa(25), mkazi wa Chiwanda wilaya ya Momba mkoani hapa, aliyejifungua watoto Januari mosi mwaka huu.

Wawamesema watoto hao baada ya kuruhusiwa kutoka hospitalini, walikumbwa na ugonjwa wa kuharisha na kubanwa na kifua.

Daktari ambaye hakutaka kuandikwa jina lake kwa kile alichodai kuwa siyo msemaji, alisema waliwapokea mapacha watatu Machi 4, mwaka huu, huku mmoja akiwa na hali mbaya zaidi ya wenzake.

Alisema muda mfupi mtoto mmoja alifariki kwa kile walichobaini kuwa alikuwa ameshambuliwa na uchafu kifuani ambao ulimsababishia kushindwa kupumua.

Alipoulizwa ruhusa ya mama huyo baada ya kujifungua, alisema kuwa Mama huyo alikatazwa kuondoka hospitalini, lakini yeye alilazimisha kuondoka na baadaye aliruhusiwa.

‘’Hawa waliobaki baada ya vipimo tuligundua kuwa hawana matatizo yeyote ya moyo,  bali walikuwa wanaharisha na kukohoa sana, tunajitahidi kuokoa maisha yao wanaendelea na matibabu’’ alisema Dr. Paul.

Kwa upande wake Aida Nakalawa, alisema huo ni uzao wake wa Nne na mtoto wake wa kwanza ana umri wa miaka saba na mwingine miaka mitano na mwingine alifariki kabla ya kujifungua mapacha hawa wanne ambao wawili wameaga dunia.

Alijifungulia katika Hospitali ya Vwawa wilayani Mbozi Januari 1, mwaka huu, ndipo alipohamishiwa hospitali ya Meta kwa ajili ya kuwatunza watoto hao wanne ambao walikuwa na uzito wa Kg.2, 1.9, 1.6 na 1.5.

‘’Tunaishi na mume wangu njia ya kutoka Tunduma kwenda Sumbawanga. Mazingira ya Nyumbani siyo mazuri sana. Niliomba niruhusiwe kutolewa hapa baada ya kuwakumbuka watoto wangu, wakanikatalia, lakini baadae nikaruhusiwa, nilipofika nyumbani watoto wakanenepa, lakini wakaaza kuumwa wakikohoa na kuharisha, mmoja akafa’’ alisema Aida, huku akiinama chini.

Kuhusu kuwanyonyesha, alisema alikuwa akiwanyonyesha na kuwapa maziwa watoto wake wote wanne kama alivyoshauriwa na wataalam mpaka wanafariki wawili kati yao.

Mpaka jana anasemaa hajui hatima ya watoto wake kwa kile alichodai kuwa kwa sasa ameelezwa kuwa muda wowote anatakiwa kwenda katika hospitali ya Rufaa ya Mbeya kwasababu katika kitengo hicho cha wazazi hawaruhusiwi kuhudumia watoto waliozidi umri wa kuanzia miezi miwili.

Mapacha wawili walio haia, wapo katika chumba cha joto katika hospitali ya Rufaa ya Mbeya kitengo cha wazazi Meta wakiendelea kupata matibabu na kunyonyoshwa kila baada ya masaa mawili.