MKURUGENZI
wa halmashauri ya Mbeya, Upendo Sanga, baadhi ya wanahabari mkoani Mbeya,
wananchi na wakuu wa idara za Halmashauri hiyo, wanatarajia kuongoza kampeni
endelevu ya kuuweka safi mji wa Mbalizi wilayani humo na kutoa elimu ya uhifadhi
wa mazingira.
Kampeni hiyo
ya usafi, inaratibiwa na kikundi cha Vijana wanaofanya kazi ya kutunza na
kuhifadhi mazingira kwa kujitolea mkoani hapa, wanaojulikana kwa jina la Vijana
wazalendo Mbalizi(UVIWAMBA).
Akizungumza
na waandsishi wa habari jana, mratibu wa kikundi hicho, Gordon Kalulunga,
alisema kuwa, itakuwa mara ya pili kwa Mkurugenzi huyo na baadhi ya waandishi
wa habari kuungana na juhudi za vijana wanaojitolea kufanya usafi katika mji
huo.
“Ni faraja
kubwa sana kwetu kuona Halmashauri yetu inaungana nasi katika kutimiza wajibu
wetu kwa taifa, hasa tunapoona Mkurugenzi na waandishi wa habari wanakuja huku
chini na kuona umuhimu wa kutoa support kwa kada ya watu tunaoamua kujitolea”
alisema Kalulunga.
Alisema
usafi huo utafanyika katika eneo la makao makuu ya Kanisa la Uinjilisti
Tanzania mpaka eneo la stendi ya Umalila, na kuhitimishwa kwa kubadilishana
mawazo endelevu ya usafi katika mji huo wa Mbalizi kati ya wananchi
watakaojitokeza na wageni watakaoongozwa na Mkurugenzi wa halmashauri hiyo.
Naye makamu
Mwenyekiti wa kikundi hicho, Ayas Yusuph, alisema kikundi chao kinafanya usafi
kila siku ya Juma mosi ya juma kwa kushirikiana na baadhi ya wananchi wa mji
huo.
“Mkurugenzi
kuungana nasi ni jambo kubwa sana ambalo linatuongezea hamasa ya kuendelea
kujitolea na hivi sasa tayari tumebandika matangazo kwa ajili ya kuwaeleza
wananchi wenzetu kuwa kila mmoja siku hiyo afanye usafi kwa hiari katika makazi
na maeneo anayofanyia kazi’’ alisema Ayasi.
Kwa upande
wake Mkurugenzi Upendo Sanga, alisema, ataungana na vijana hao pamoja na baadhi
ya wakuu wa idara ya mazingira, kufanya usafi katika mji huo ambao ni kioo cha
wilaya na mkoa wa Mbeya kwa wageni wanaotumia usafiri wa ndege wa kimataifa wa
Songwe.
“Nitashiriki
katika zoezi hilo la usafi siku ya Jumamosi. Ni wajibu wangu na wananchi wote,
maana Mbalizi ni kioo cha mkoa wa Mbeya kupitia uwanja wa Ndege wa kimataifa wa
Songwe, ambao upo katika wilaya yetu na mgeni yeyote anayetaka kwenda katikati ya
Jiji la Mbeya, lazima apite Mbalizi” alisema Upendo Sanga.
Kushirki katika
kazi hiyo ya usafi kwa Mkurugenzi huyo, kutakuwa kwa awamu ya pili, ambapo
awali mwaka jana, alishiriki katika kuzibua baadhi ya mitaro iliyokuwa imeziba
katika stendi kuu ya wilaya hiyo, iliyopo eneo la Tarafani katika mji wa
Mbalizi.
Kwa sasa
Serikali, inaendelea kukamilisha ujenzi wa barabara ya kiwango cha lami katika
mji huo.
Hakuna maoni:
Chapisha Maoni