DC CHUNYA AHAMASISHA MICHANGO YA MAABARA

 

Mkuu wa wilaya ya Chunya Ndugu Deodatus Kinawiro.(Picha na kalulunga media blog).

MKUU wa Wilaya ya Chunya Deodatus Kinawiro (DC), amewataka wananchi wa Kijiji cha Namkukwe Kata ya Namkukwe Wilayani hapa,  kuchangia Tsh,10,000/= kila mmoja, ili kukamilisha ujenzi wa maabara ya shule ya sekondari Namkukwe.

Kauli hiyo ameitoa wakati wa ukaguzi wa maabara katika kata zote za wilaya ya Chunya ambapo alibaini kata ya Namkukwe pekee ndiyo haijaanza ujenzi wa maabara.

Aliwapongeza wananchi wa kata ya Totowe kwa kwenda kasi na ujenzi huo ambapo wamefikia hatua ya mtambaa panya na serikali itatoa milioni 13 kwa ajili ya kumalizia ujenzi huo na fedha hizo zitatumika kununulia mabati na mbao kwa ajili ya kuezekea jengo hilo.

Kila mwananchi wa Kata ya Totowe huchangia elfu sitini na tano kila mmoja na kwa kuona umuhimu wa elimu wengi wameitikia mpango huo wa Taifa na majengo yote nchini yanatakiwa kukamilika mwishoni mwa mwaka huu.

Kata ya Namkukukwe kumekuwa na marumbano, na Mkuu wa wilaya amesema atakayekaidi atachukuliwa hatua za kisheria.