MAMLAKA YA MAJI MBEYA YAJIVUNIA MAFANIKIO YA KUTOKOMEZA KIPINDUPINDU

Rais Dkt. Jakaya Mrisho Kikwete,Kamishna wa Maendeleo Jumuiya ya Ulaya Andris Piebalgs(Watau kushoto) na Waziri wa Maji Profesa Jumanne Maghembe  wakikagua chanzo cha maji eneo la Swaya mjini Mbeya wakati wa uzinduzi wa mradi maji safi na mazingira.

 

 

LICHA ya kukabiliana na changamoto kadhaa za uendeshaji shughuli zake, MAMLAKA ya maji safi na usafi wa Mazingira Jijini Mbeya (MBEYA-UWSA) imewahimiza wananchi kuendelea kulipa ankara za maji kwa ajili ya kuiwezesha Mamlaka hiyo kuendelea kudhibiti magonjwa ya milipuko kikiwemo Kipindupindu.

Kaimu Mkurugenzi wa Mamlaka hiyo ambaye pia ni Injinia wa ufundi, Martin Kimambo, amesema Mamlaka yake imewezesha na inajivunia kudhibiti kipindupindu na kufikia hatua serikali kufunga kambi la ugonjwa huo eneo la Isanga Jijini Mbeya.

Alisema gharama kubwa zinatumika katika kununua dawa za kutibu maji na kulipia umeme.

‘’Tunatumia Tsh. 50 Mil, kwa mwezi kwa ajili ya kununua dawa ya kutibu maji na Tsh. 70 Mil, kwa ajili ya kulipia umeme, hivyo wananchi ni wajibu wao kukumbuka kulipia gharama za maji safi wanayoyapata ili kuiwezesha mamlaka kutimiza wajibu wetu’’ alisema Kimambo.

Aliongeza kuwa kwa sasa tangu mamlaka hiyo ianze kukazania suala la kutibu maji, ni miaka 13 tatizo la ugonjwa wa kipindupindu uliokuwa ukilipuka kila msimu wa mvua Jijini hapa, kwa sasa ni historia.

 ‘’Wananchi wanaokatiwa huduma ya maji wasipolipa wasilaumu, ni kwa ajili ya kutekeleza majukumu yetu kwa faida ya wananchi wote’’ alisema Injinia Kimambo.

Afisa habari wa Mamlaka hiyo, Neema Stanton, alisema wanajisikia fahali kuwahudumia wateja wanaokumbuka wajibu wao wa kulipia huduma za maji kwa wakati jambo ambalo linaisaidia mamlaka kutekeleza majukumu yake.

Amewasihi wateja wapya wanaotaka kuunganishiwa maji kufika ndani ya ofisi za Mamlaka hiyo kwa kile alichosema kuwa kuunganishiwa maji na mamlaka ni gharama za kawaida bali ni ghali akikamatwa mteja aliyeunganishiwa huduma hiyo na mafundi vishoka.

Mamlaka hiyo inaendelea na zoezi la kuwakatia huduma za maji wateja wanaodaiwa wakiwemo wateja wa majumbani, hotel kisha taasisi za serikali ambazo zinadaiwa.