Huu ni mfuniko wa chemba ya maji taka,
ambapo mifuniko ya chuma imekuwa ikiibwa na wahalifu jambo ambalo
linaendelea kuikwamisha kutoa huduma bora Mamlaka ya maji Mbeya na
kutokea malalamiko hasa nyakati za mvua ambapo maji yakiingia, chemba
nyingi zinafurika uchafu.
Juu na chini, maandamano yakiwa katikati ya Jiji la Mbeya.
Maandamano yakiendelea. Hapa tayari safari ya kurudi ofisi za Mamlaka kwa ajili ya hotuba na sherehe kwa ujumla.
Hiyo ndiyo kauli mbiu ya mwaka huu 2014. UHAKIKA WA MAJI NA NISHATI
Kutoka kushoto ni Mkurugenzi wa Mamlaka
ya maji Mbeya, Mhandisi, Simon Shauri na Mwenyekiti wa bodi wa Mamlaka
hiyo, Jaji Atuganile Ngwala(wa pili kushoto), wakiongoza maandamano ya
mshikamano.
Kulia ni Mwanafunzi OMBENI, wa shule ya
Msingi Isanga, anayesoma darasa la tatu, akiwa na kuni pembeni ya
maandamano hayo ya mshikamano ambayo hayajaleta bugudha yeyote ya
kijamii katikati ya Jiji la Mbeya na njia zote yalipopita.
Sasa tunakaribia kufika na kuhitimisha maandamano yetu......
Maandamano yakiingia kwenye lango kuu la ofisi za Mamlaka ya maji Mbeya...
Kisima cha Mamlaka ya Maji Mbeya,
ambacho kinatumika kwa kufuga samaki. Kipo katikati ya ofisi za maji
Mbeya eneo la Ujenzi Jijini Mbeya. 
IKIWA mwishoni mwa wiki imefanyika sherehe ya kilele
cha maadhimisho ya wiki ya maji, wananchi wa eneo la DDC Kalobe Jijini Mbeya,
wameilalamikia Mamlaka ya maji safi na usafi wa Mazingira Jijini hapa
(MBEYA-UWSA) kushindwa kutengeneza miundombinu imara ya maji taka.
Wananachi hao
walisema kuwa, familia zao zipo hatarini kukumbwa na magonjwa ya mlipuko hasa
watoto baada ya kila inaponyesha mvua, matenki(Chember) za maji machafu kufurika
vinyesi na kuzagaa kwenye maeneo wanayoishi.
Walisema kuwa, taarifa hizo wamezifikisha kwenye
mamlaka husika lakini bado tatizo linazidi kuwa kubwa.
Kaimu Mkurugenzi wa Mamlaka hiyo ambaye pia ni
Mhandisi wa ufundi, Martin Kimambo, alipohojiwa alikiri kuwepo kwa tatizo hilo
nyakati za mvua kwa kile alichosema kuwa ni kutokana na wizi wa mifuniko ya
chuma ya chemba hizo kukithiri.
‘’Tatizo hilo lipo kutokana na Mamlaka kuhujumiwa na
wahalifu ambao wanaiba mifuniko ya chemba za maji machafu, hivyo maji
yanapokuwa mengi yanasababisha chemba zingine kuzidiwa’’ alisema Injinia Kimambo.
Alisema chemba za Mamlaka hiyo, zina uwezo wa kuhimili
maji yanayotumika kwenye vyoo tu, hivyo mvua zinaponyesha na maji kujaa kwenye
chemba ambazo zimeibiwa mifuniko ambayo kila mmoja haupungui Shilingi Laki
mbili, ndiyo chanzo cha wananchi walio katika maeneo ya kalobe kupata tatizo hilo.
Katika tatizo hilo, imegundulika kuwa mifuniko mingi
imeibwa eneo la katikati ya Jiji likiwemo eneo jirani na kituo kikuu cha Polisi
mkoani hapa, ambayo inasadikika kuwa wezi hao wanaiuza kama vyuma chakavu.
Kwa upande wake Mkurugenzi Mtendaji wa Mamlaka hiyo,
Mhandisi, Simeon Shauri, alizitaja changamoto wanazokabiliana nazo kuwa ni
pamoja na baadhi ya vyanzo vya maji kuendelea kupungukiwa maji, hali
inayochangiwa na uharibifu wa mazingira pamoja na mabadiliko ya haidrolojia.
Alitaja baadhi ya vyanzo vinavytishiwa na upungufu
huo wa maji kuwa ni pamoja na chanzo cha mto Lunji na Mfwizimo na Iduda.
‘’Wizi wa dira za maji na uhujumu wa miundombinu ya
Majisafi na maji taka na baadhi ya wateja hususani Taasisi za umma kutolipa ankara
za maji kwa wakati au kutolipa kabisa’’ alieleza changamoto hizo, Mkurugenzi
Mtendaji huyo.
Mbali na changamoto hizo aliyataja mafanikio ya
Mamlaka hiyo kuwa ni pamoja na kuzalisha maji safi na salama na kuyasambaza kwa
wakazi takribani asilimia 96 wa Jiji la Mbeya, wanaopata huduma hiyo kati ya
masaa 15-24 kila siku.
Mafanikio mengine alisema ni kuendelea kuboresha
miundombinu kupitia miradi ya wafadhili na kufanikiwa kupeleka maji uwanja wa
ndege wa Songwe na kuendelea kufanya juhudi za kuhifadhi vyanzo vya maji kwa
kushirikiana na wadau mbalimbali.
Hakuna maoni:
Chapisha Maoni