KILA KAYA MBEYA MJINI YATAKIWA KUWA NA MBOGAMBOGA

WAKAZI jijini Mbeya, wametakiwa kuwa na bustani za mbogamboga ili kuweza kujikimu kimaisha na kuimarisha afya zao na watoto wao.

Ushauri huo umetolewa na Mratibu wa shirika lisilo la kiserikali la Anglican Church dayosisi ya nyanda za juu kusini, Fadhili Nswilla, alipkuwa akizungumza na waandishi wa habari jana, katika ukumbi wa Jiji la Mbeya.

Nswilla alisema kuwa, kaya kuwa na kitalu cha mbogamboga, inapunguza utapiamlo kwa jamii pamoja na umasikini wa chakula pale kaya husika inapokosa fedha za kununulia mboga.

Alisema shirika lake kwa kushirikiana na Pact Tanzania chini ya ufadhili wa USAID, wanatekeleza mradi unaoitwa pamoja tuwalee, wenye lengo la kutete na kulea watoto wanaoishi katika mazingira hatarishi.

“Jamii ielewe kuwa suala la kulea watoto wanaoishi katika mazingira magumu siyo la serikali pekee, bali ni la jamii” alisema Nswilla.

Alisema changamoto kubwa wanayokumbana nayo katika kutekeleza mradi huo ambao unawajengea uwezo wananchi na vikundi vya kulea watoto wanaoishi katika mazingira magumu badala ya kuwapa fedha au vitu, ni pamoja na suala la wengi kutopenda kujinga.

“Tunaijengea uwezo jamii kwa mujibu wa serikali ambapo jamii inapaswa kujitegemea na wala siyo kupewa fedha ama vitu kama miradi mingine iliyopita, ambapo miradi ikiisha wananchi walikuwa wakirudi kwenye umasikini uleule” alisema.

Aliisihi jamii kuwa karibu na wahitaji ambapo kila mmoja akitimiza wajibu wake jamii itaondokana na tatizo la watoto wanaoishi katika mazingira hatarishi na umasikini utapungua kwasababu ndani ya jamii kuna wataalam wa kila aina, wakiwemo walimu, viongozi wa dini na wataalam wengine.

Mthamini na mfuatiliaji wa mradi huo, Ebby Erasto, alisema Shirika la National youth International Center(NICE), kwa kushirikiana na Anglican, wanatekeleza mpango wa pili wa serikali wa kutoa stadi za kazi badala ya vitu kama ulivyokuwa mpango wa kwanza wa serikali.

Alisema wanaiwezesha kaya iliyokubali kupata stadi za maisha kujitegemea, ambapo mpaka sasa vikundi 21 vimeundwa na kuwezeshwa bure na kuwataka wafanyabiashara na wanajamii kwa ujumla kuanza sasa kuona jukumu la kulea waishio mazingira hatarishi ni lao.

Kwa upande wake afia ustawi wa jamii, Jijini Mbeya, Bupe Joel, alisema tatizo ni kubwa la watoto wanaoishi katika mazingira hatarishi jijini Mbeya, lakini tangu mwaka 2008 hajui takwimu sahihi katika eneo lake.

“Tatizo ni kubwa sana, kwa mwaka 2006-2008 kwa kushirikiana na Pact, takwimu zilikuwa ni watoto 18, 600 waliokuwa wakiishi katika mazingira hatarishi, lakini kwasasa tunawategemea wenzetu hawa wa mashirika yasiyokuwa ya kiserikali yatuletee takwimu za kipindi hiki’’ alisema Bupe Joel.

Mfanyabiashara Jeremiah Mahenge, ambaye pia ni mmoja wa wadau walioalikwa kwenye kikao hicho, alisema jamii ya watu wa mkoa wa Mbeya hawapendi kuhudhuria vikao vya msingi vya kuhudumia jamii bali wengi wanapenda vikao vya harusi na kusahau kuwa jukumu la kulea wahitaji ni la jamii nzima.

Aliyasema hayo baada ya wadau wengine waliokuwa wamealikwa, kutohudhuria kikao hicho.